منتدى الفرح المسيحى - يارب علمنا إحصاء أيامنا

https://upload.chjoy.com/uploads/170081492257291.jpg

لو بصيت وراك
هتلاقي الزمن بيجري بسرعة رهيبة

هتلاقي ان ال ١٠ سنين مالهاش هيبة زي الأول
يعني هتلاقي اخر ١٠ سنين من حياتك كأنهم ٣ سنين

هتلاقي السنة بتبدأ و فجأة تلاقيها بتخلص

هتلاقي حدث كبير في حياتك
فات عليه سنين كتير و إنت مش عارف ده حصل إزاي

متعرفش ده قلة بركة في الوقت
ولا بسبب التكنولوجيا و غياب الملل
بقي الرتم سريع

ولا بسبب اللهو الزائد و ان حواليك
مليون حاجة تتابعها
بقي الوقت بيتسرق منك

في كل الحالات
و أياً كان التفسير
النتيجة واحدة العمر بيجري بسرعة

الحل من وجهة نظري
صلوة صلاها الشعب زمان مع موسي بتقول :

إِحْصَاءَ أَيَّامِنَا هكَذَا عَلِّمْنَا فَنُؤْتَى قَلْبَ حِكْمَةٍ."
(مزمور 90: 12).

يعني علمنا نعمل إحصائية لأيامنا

لو دخلت علي حاجة معينة في اعدادات فيسبوك
لو عندك صفحة أو لو عندك قناة علي اليوتيوب
هتلاقيه عاملك إحصائية

النهاردة نزلت كام بوست و تابعك قد ايه
و شافوا كام دقيقة
و نسبة نجاحك بالنسبة لليوم اللي قبله قد ايه
والشهر اللي قبله قد ايه

العالم إتعلم حتة احصاء الأيام دي جداً
لكن إحنا لسه ..

محتاجين مهارة إحصاء الأيام
ان كل يوم يكون فيه خطة مثمرة
وتقييم لليوم و الشهر و السنة

فتكون النتيجة
فَنُؤْتَى قَلْبَ حِكْمَةٍ." (مز 90: 12).

يعني يكون عندنا حكمة كفاية للتعامل مع الوقت و الزمن
مش بيتسرق مننا و احنا مش حاسين
و احنا معرفناش نستغله و نثمر فيه .

يارب علمنا إحصاء أيامنا
علشان أيامنا متخلصش و نندم علي حاجات كتير معلناهاش.