|
أبجدية التربية - ابونا داوود لمعى
التربية محتاجة جهاد .. جهاد في تأصيل المبادئ مثل : تأصيل الصدق فالطفل لازم يعدي عليه مرة أو مرات أنه يكذب .. لازم تجاهدي كأم أنك تقنعيه إن الكذب مُضر وإن الصدق مهما حصل مُفيد .. - الجهاد والمجهود بتاعك هو اللي هيخلي الطفل يقتنع إن الكذب مش حل والكذب مش وسيلة لتغطية الأخطاء ولكن الكذب جُبن وشغل عيال .. - فعشان تسمع ولادك وهما بيقولوا كلام فارغ محتاج جهاد .. عشان تفضل مبتسم وأنت شايل هَم الدنيا محتاج جهاد .. عشان تفضل تشجع وأنت عايز اللي يشجعك محتاج جهاد .. عشان تيجي على نفسيتك وتمنع نفسك من القلق عشان أبنك يآخد حرية ويثبت نفسه بعيد عنك محتاج جهاد .. !! أبجدية التربية ابونا داوود لمعى يتبع |
رد: أبجدية التربية - ابونا داوود لمعى
- في التربية المسيحية أنت تجاهد أكتر من أي أب وأم في الدنيا لأن في الدنيا عايزين يغرسوا مبادئ معينة مثلاً النجاح والتفوق ولكن غرس المبادئ المسيحية يحتاج إلى مجهود أكبر لأنه الطريق الضيق والطريق الأصعب .. - فأنتي هتحتاجي مجهود أكبر أنك تعلمي أبنك (( إياااك والغش حتى لو سقط - تذاكر أكتر بس مش هتغش .. !! )) أبجدية التربية ابونا داوود لمعى |
رد: أبجدية التربية - ابونا داوود لمعى
- مساحة الحرية مكفولة لأولادنا وتزيد بالعمر ..
يعني كل ما الطفل يكبر شوية تدي له حتة حر فيها أكتر ولكنه ميلغيش أنك أنت كأب وأم تبقى صاحب قرارك .. - فالطفل بيبقى عايز يطمن إن بابا وماما دول أقوياء .. فيوم ما يحصل مشكلة هأجري وأستخبى وراهم .. - لكن لو الطفل هو اللي بيمشي كلامه على البيت هيفضل عنده قلق طول العمر لأنه مقتنع أنك ضعيف كأب وأم فيوم ما تحصل مشكلة الرعب يزيد لأنه من الأول هو أصلا مستضعفك .. فإذا مكنتش قادر عليه هو هتقدر على المشاكل .. !! أبجدية التربية ابونا داوود لمعى |
رد: أبجدية التربية - ابونا داوود لمعى
- الشكل الصح للأسرة هو أن الطفل شايف الأب مسئول والأم خاضعة ولكن غير مقيدة..
- فبابا مسئول كرجل وماما بتحترمه أوووي وبتسمع كلامه وبابا بيحترم ماما (( وبيسمع لها )) فالقيادة للرجل وفي حرية للأم .. فيبقى عارف يشوف إن في قيادة جماعية مش خناقة بين الكبار .. - فالخناقات تخلي الطفل مالوش كبير .. - فالأب هو القائد والأم (( خاضعة وليس خانعة )) والطفل يعرف يميز بين الكلمتين (( فيعرف هل أمه غصب عنها بتسمع الكلام ولا برضاها فرحانة وبتسمع الكلام .. ؟؟ )) فالطفل اللي شايف خنوع لازم يطلع ثورجي وعداواني أو منسحب وعديم الشخصية. أبجدية التربية أبونا داود لمعي |
رد: أبجدية التربية - ابونا داوود لمعى
التربية عايزة جهاد .. لأن ولادنا دلوقتي لطشتهم الفلوس فلو مغرسناش كفاية (( مبدأ الأكتفاء - مبدأ العطاء بسخاء - مبدأ الكنز السماوي )) هيطلعوا الأولاد بيجروا وراء الفلوس ويدوسوا على الآباء والأمهات ..
- البيت هو المصنع الأول للقديسين (( البيت قبل الكنيسة )) لأن مدارس الأحد لوحدها متقدرش تعمل كل حاجة .. فإذا مكنش الآباء والأمهات يركزوا والبيت يبقى نفسه كنيسة مش هيطلعوا العيال كويسين .. أبجدية التربية ابونا داوود لمعى |
رد: أبجدية التربية - ابونا داوود لمعى
- أحترم ذهن الطفل .. إذا مكنتش هتعرض المعلومة بطريقة جديدة وتثير ذهنه للتفكير يبقى أنت بتحتقر ذهنه ..
- القديس أثناسيوس الرسولي لما كتب أروع كتاب في التجسد كان عمره أقل من 20 سنة ... ده معناه أن وهو طفل كان مخه حاضر وبيستوعب وكتب كتاب رائع من قبل ما يبقى بطرك. أبجدية التربية أبونا داود لمعي |
رد: أبجدية التربية - ابونا داوود لمعى
- في تربية ذهن طفلك أستخدم منهج (( السببية في التفكير )) .. وكل الأطفال عندها أستعداد لهذا المنهج لأن من أوائل الكلمات اللي يقولها أي طفل كلمة (( ليه )) .. فالأستعداد الطبيعي عند الطفل أنه يفكر .. فمجرد أني حطيت (( ليه )) قدامه كتير أنا خليته يفكر ويتحاور وذهنه يشتغل .. أبجدية التربية أبونا داود لمعي |
رد: أبجدية التربية - ابونا داوود لمعى
دورنا في التربية إن منذ الصغر نربي في الطفل أنه يتعلم يفكر ويتعلم يسأل ونحترم سؤاله ونناقش سؤاله ونعلى بذهنيته ونحط المعلومة مش على مجرد الحفظ ولكن الحفظ مينفعش نتجاهله لأن له قيمة ولكن يجب أن يوضع الحفظ بجانب التفكير المظبوط فتطلع الشخصية جميلة .. - وكل ما نعملها بدري يطلع لنا جيل قوي يحترم كنيسته ومقتنع بعقيدته ويبشر بيها ويقنع الناس كلها بيها .. فأحنا ربنا أدانا عقل ليه بنتجاهله .. !!! والسيد المسيح منطقي جداً وعقلاني جداً في حواراته .. في دايماً (( ليه )) في كل كلمة بيقولها المسيح .. أبجدية التربية أبونا داود لمعي |
رد: أبجدية التربية - ابونا داوود لمعى
- ماينفعش الزمام يطلع بره أيدك كأب وأم خاصة في أول عشر سنوات ..
فماينفعش ولادك يمشوك لأنك لازم تملك زمام الأمور .. - الأب الضعيف بيطلع عيال مشوهة نفسياً .. أحنا مش عايزين أب قاسي ولكن أب يَمُلك قرار .. - الأم الضعيفة عيالها يستغفلوها ويستقلوا بيها .. والبنت اللي محترمتش أمها مش هتحترم زوجها .. أبجدية التربية ابونا داوود لمعى |
رد: أبجدية التربية - ابونا داوود لمعى
- الأم الضعيفة عيالها يستغفلوها ويستقلوا بيها ..
والبنت اللي محترمتش أمها مش هتحترم زوجها .. صح يا قمر ربنا يباركك حببتي |
رد: أبجدية التربية - ابونا داوود لمعى
- الروحانية عايزة مجهود وتركيز وعايزة حياة روحية حقيقية من الأب والأم عشان تنعكس على العيال .. - أحزروا من التزمت والحرفية لئلا نطلع عيالنا فريسيين مش قديسين لأن في بعض الآباء والأمهات الدنيا بالنسبة لهم حرفيات .. الزوج يخرب الدنيا لو مراته حطت نقطة سمنة بدل الزيت يوم الأربعاء لكن هو عمال يشتم ويعيب في الناس .. أنت هتطلع أبنك حريص أوووي على الأربعاء والجمعة لكن هيكره الناس ومش هيعرف يحب حد لأنك قدمت له صورة مشوهة لتدين مزعج .. !! أبجدية التربية ابونا داوود لمعى |
رد: أبجدية التربية - ابونا داوود لمعى
- الأم البشوشة تطلع عيال نفسيتهم سوية حتي لو كانت جاهلة والعكس ممكن تكون الأم معاها دكتوراة ووشها كشري تطلع عيالها نفسيتهم ملخبطة. - لما الطفل يشوف وش أبوه مكشر .. أول ترجمة توصل للطفل هي : (( أنا السبب في تعب أبويا )) لأن الطفل يميل إلى أن يستذنب نفسه. - لما الطفل يلاقي أمه غضبانة (( بيكره نفسه )) لأنه مش قادر يكرهها لأنه مفكر إن هو السبب في غضبها. أبجدية التربية ابونا داوود لمعى |
رد: أبجدية التربية - ابونا داوود لمعى
- علشان تكون ثقة أبنك فيك ماتقولش كلمة متعملهاش ومتقولش كلمة مش قدها .. - من الحاجات اللي تبوظ الثقة خاااالص في التربية إن الأب يقول لأبنه : (( إياك أشوفك تكذب هأقطعك .. )) وبعدها بساعة على التليفون يحكي روايات كلها كذب .. الطفل ده هيكذب ويغش ويلخبط الدنيا لأنه فقض الثقة في شخصية مهمة جداً بالنسبة له .. !! أبجدية التربية ابونا داوود لمعى |
رد: أبجدية التربية - ابونا داوود لمعى
- الروحانية يعني كل ما الأولاد يكبروا نناقش المبادئ لأن أحنا كمسيحيين لازم نفضل مختلفين .. - فأي طفل بيبقى عايز يقلد ومش عايز يبقى مختلف لأن الأختلاف تحدي وأسهل أنه يبقى ذيه ذي أي حد في جيله .. - فلاااازم أغرس في الطفل الأختلاف .. أنت مسيحي - أبوك ربنا - أنت أتعمدت - أنت بتتناول .. فأنت مختلف وأختلافك مش يكسفك ولكنه مصدر فخر وثقة وليس كبرياء لأن أنا أبويا ربنا .. أبجدية التربية ابونا داوود لمعى |
رد: أبجدية التربية - ابونا داوود لمعى
- الثقة تُنَمَى على مراحل فلازم تثبت لأبنك أنك واثق فيه بس تدي له مهمة يقدر يعملها لأني لو أديت لأبني مهمة يعجز عن فعلها فأنا ضريته وهزيت ثقته بنفسه .. - الأهتمام المبالغ فيه على الطفل هيخليه دايما دلوع .. فلازم يجي لحظة أني (( هأرميه )) هي مش سهلة نفسياً على الآباء والأمهات لكن لازم أوصل (( للفطام )) عشان يعتمد على نفسه ويثق بنفسه .. أبجدية التربية ابونا داوود لمعى |
رد: أبجدية التربية - ابونا داوود لمعى
- نظرتك للناس وأحترامك لكل الفئات بينعكس على أولادك .. - الروحانية الطفل بيشوفها : 1- لما الطفل يلاقيك أنت بابا بتحترم أصحابه وبتحترم البواب والفراش وحتى وأنت بتحكي عن شغلك مش بتشتم شتيمة ولا بتعيب في حد .. 2- لما بتستقبل الناس والبشاشة في وشك وتكرمهم وتحترمهم ومش من ورا ضهرهم تقول عليهم كلمة لأن الطفل ذكي وبيلقط .. أبجدية التربية ابونا داوود لمعى |
رد: أبجدية التربية - ابونا داوود لمعى
التشجيع بيبان وأنت بتتكلم عن ولادك
سواء بتعرفهم بحد أو بتتكلم عنهم .. وأنت بتقدم ولادك بيبان في لغتك (( هل أنت فخور بيهم ولا أنت مكسوف منهم .. ؟؟ )) - لو الطفل حس إن أبوه خجلان منه ده دمر كل حاجة جواه .. فما أصعب على نفسية طفل أن اللي بيسخر منه أبوه اللي كان المفروض يفتخر به أبجدية التربية أبونا داود لمعي |
رد: أبجدية التربية - ابونا داوود لمعى
سؤال: كيف أتغلب على ممشكلة الكسل في الصلاة (ماليش نفس أصلي!)؟؟ افتكر حاجتين يشجعوك على الصلاة.. الصليب و السما .. - على الصليب افتكر ربنا اللي بيحيك و اللي ياما تعب و بيتعب علشانك.. على الأقل قدر حبه و واقف قوله بحبك... - ركز على السما لأن من غير صلاة مفيش سما... ابونا داوود لمعى |
رد: أبجدية التربية - ابونا داوود لمعى
مواضيع مهمة لحياتنا
ميرسي على مجهودك يا سمسمة |
رد: أبجدية التربية - ابونا داوود لمعى
مجهود رائع جدااااا
ربنا يجعل كل بيت كنيسة صغيرة ربنا يفرح قلبك |
| الساعة الآن 04:07 AM |
Powered by vBulletin® Copyright ©2000 - 2025